» Notisias

Sesta, 11 Jullu 2014

Kongresu Feto Distritál Ermera

Atu apoiu feto sira ba partisipa iha programa Desentralizasaun ne’ebé sei harii Munisípiu iha kada Distritu, Sekretaria Estadu ba Promosaun Igualdade organiza Kongresu Feto Distritál iha distritu hotu-hotu Timor-Leste nian. Liu husi Kongresu ne’e SEPI hamutuk ho organizasaun sosiedade sivil sira apoiu ba feto iha distritu ida-idak atu prepara an ba partisipa iha munisípiu ne’ebé Governu Timor-Leste sei harii iha tempu badak.

Kongresu Feto Distritál nia atividade mak: Diálogu ho Sekretária Estadu ba Promosaun Igualdade; Kapasitasaun ba feto sira kona-ba asuntu relevante hodi prepara sira ba Munisípiu; Diskusaun temátika hodi formula Plataforma Feto Distritál; Halo estatutu Asosiasaun Feto Distritál no eleisaun ba ninia estrutura; no Tomada de posse ba Asosiasaun Feto Distritál.

Kongresu Feto Distritál iha Ermera hala’o iha loron 8-9 fulan Juńu tinan 2014. Iha abertura, Presidente Grupu Traballu Jéneru Distritu (GTJD) Ermera Sr. Danino Babo hato’o katak GTJD Ermera hala’o hela atividade hirak maibé dala barak sira la bele to’o ba área rural. “Ami halo esforsu nafatin para bele haree kona-ba ne’e. Maibé dala barak ami nia rekursu mak la to’o. Hein apoiu husi nasionál para bele suprota servisu distritu nian,” katak Sr. Danino Babo.

Administradór Distritu Ermera Vitor do Santos iha ninia palestra hato’o katak servisu ida ne’e presiza servisu hamutuk. Kona-ba feto Ermera nia atividade, Administradór hatete katak, “Feto Ermera mak suporta programa tarabandu, tanba feto ermera mak luta ba tarabandu ne’e bele hetan susesu. To’o ohin loron iha Ermera komesa iha ona tarabandu.”

Sr. Vitor dos Santos hateten katak durante tinan 10 Timor-Leste ukun an foin mak ba dala uluk hala’o kongresu feto iha Distritu Ermera. “Kongresu ne’e importante tebes atu inan-feton sira bele diskute hodi hili lider ne’ebé diak atu dezenvolve feto Ermera ho diak ba futuru,” kata Sr. Vitor dos Santos.

Entretantu, Prezidente Komisaun Organizadora Sra. Maria Exposto haktuir katak liu husi kongresu ne’e, feto Ermera loke pájina foun ida tan ba partisipasaun feto iha dezenvolvimentu.

Marka mos presensa iha iha kongresu ne’e Sekretaria Estadu Desentralizasaun administrative Sr. Thomas Cabral, Adjuntu PNTL distritu Ermera Sr. Lucas Tilman hamutuk ho partisipantes kongresu sira mai husi Sub. Distritu Lima Atsabe, Letefoho, Railako, Hatulia ho Gleno.

Iha kongresu ne’ebe ho nia tema “Haforsa Partisipasaun Feto iha Asaun Progresu ba Dezemvolvementu Lokál” ne’e, feto Ermera sira harii organizasaun ida ho naran Aliansa Feto Ermera (AFER). Kongresista sira mós hili ema sira ne’ebé atu lidera organizasaun ne’e liu husi pakote rua, katak Pakote A ho Pakote B. To’o ikus hili Pakote B, ne’ebé lidera husi Sra. Maria da Costa Exposto mak sai mana-na’in ho votus afavor 115, invalidu 3, no abstensaun 46. Pakote A mós lidera husi Sra. Maria da Costa Exposto.

Pakote kompletu ne’ebé sei lidera AFER ba periódu 2014-2018, kompostu husi Sra. Maria da Costa Exposto, Sra. Aquelina Guterres, Sra. Paulina do Rosario Lemos, Sra. Agosta Lemos da Cruz, Sra. Maria Jenoveva, Sra. Guilhermina Soares, Sra. Lola Maia, Sra. Lizia Madeira, Sra. Jinha M de Carvalho, Sra. Isabel S. Madeira, Sra. Guida Martins, Sra. Nivia A. dos Santos, no Sra. Santina Tilman.

Presidente eleitu AFER, Maria da Costa Exposto sente ninia knaar todan tebes. “Maibe tanba konfiansa tomak, ami promete halo funsaun ho diak. Iha tempu badak AFER sei identifika feto potensial iha Distritu no Nasional atu prepara an kompete iha munisípiu,” katak Sra. Maria da Costa Exposto.


Departamentu Media SEPI | Author : Luisa
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255489

Ohin loron : 44
Hits ohin loron : 317
Total : 52783
Hits : 255489
Online : 6