» Notisias

Segunda, 18 Agostu 2014

Sosializasaun Lei Kontra Violénsia Doméstika iha Liquiça

Sosializasaun ba Lei Kontra Violénsia Doméstika ba Distritu Liquiça hala’o husi Sekretaria Estadu ba Promosaun Igualdade (SEPI) iha Suku Guiço, Sub-distritu Maubara iha loron Kinta-Feira, 14 Agostu 2014.

“Objetivu husi sosializasaun ne’e mak atu aumenta koñesementu komunidade sira kona-ba violénsia bazeia ba jéneru, liu-liu Lei Kontra Violénsia Doméstika,” Pontu Fokál SEPI Distritu Liquiça, Sra. Fátima Lopes Alves nu’udar responsavel ba atividade ida ne’e. Lei Kontra Violénsia Doméstika define violénsia doméstika nu’dar krime públiku.

Atividade sosializasaun ne’e hetan mós partisipasaun husi Sekretáriu Distritu Liquiça ne’ebé mós nu’udar Prezidente Grupu Traballu Jéneru Distritu Liquiça Sr. Aurentino dos Santos. Iha biban ne’e Sr. Aurentino dos Santos mós esplika tanba sa Suku Guiço sai nu’udar fatin hodi hala’o sosializasaun kona-ba Lei Kontra Violencia Doméstika. “Suku Guiço nu’udar suku ne’ebé izoladu ka dook tebes husi Liquiça, nomós sai hanesan fatin ne’ebé nia pursentu as liu akontese violénsia doméstika kompara ho suku hotu iha Distritu Liquiça,” katak Sr. Aurentino dos Sanos.

Sekretáriu Distritu mós salienta liután katak depois realiza sosializasaun ida ne’e, nia husu atu komunidade hotu, liu-liu feto sira atu labele tauk ba hato’o ba autoridade lokál ka Polísia Komunitáriu, sekarik ema ruma iha hanoin no halo ka obriga feto sira hodi hala’o relasaun seksuál, baku no hahalok seluk ne’ebé fo ameasa ba feto nia moris. “Dala ida tan hau hatete be imi katak ba hato’o lalais iha lider komuitáriu no Polísia Komunitariu, tenik Sr. Aurentino dos Santos.

Iha sosializasaun ne’e Ponto Fokál SEPI Sra. Fátima Lopes Alves sai mós nu’udar oradora hodi salienta ba komunidade katak violénsia doméstika ne’e krime públiku. “Maske povu dala barak rezolve problema violénsia doméstika liu husi dalan kultura ka fó sala malu, maibé ohin loron lae ona. Governu rekoñese hahalok no atitude ne’e kontra lei no konstitusaun RDTL. Tanba ne’e se mak komete ba hahalok nune’e sei hetan kastigu prizaun tinan hitu no sei multa ho osan montante USD 2.000,” esplika Sra. Fátima Lopes Alves.

Iha biban ne’e Xefe Suku Guiço, Sr. Liberato Araújo Nunes fo sai katak problema violénsia doméstika sai nu’udar problema ne’ebé makaas iha nia suku rasik. “Hau sempre buka soluzaun no rezolve. Maibé depois rezolve liu loron deit problema nune’e sempre akontese fila fali iha ema hanesan ka dala barak mós husi ema seluk fali. Tan ne’e hau sente kontente Governu liu husi Sekretaria Estadu ba Promosaun Igualdade mai organiza sosializasaun kona-ba Lei Kontra Violénsia Doméstika iha hau nia suku,” katak Sr. Liberato Araújo Nunes.

Sosializasaun ne’e rasik hetan fundus husi Ministériu Administrasaun Estatal ho montante $ 1.500. Iha sosializasaun ne’e hetan partisipasaun husi komunidade Suku Guiço, Administrador Sub-distritu Maubara Sr. Laurentino, Adjunto Saúde Distritu Liquiça Sr. Alberto nu’udar mós membru Grupu Traballu Jéneru Distritál, niklui Pontu Fokál SEFOPE no Reprezentante Departamentu Monitorizasaun SEPI, no Reprezentante Departamentu Media SEPI.


Departamentu Media SEPI | Author : Elizeu
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270090

Ohin loron : 30
Hits ohin loron : 135
Total : 56221
Hits : 270090
Online : 2