» Notisias

Kinta, 25 Setembru 2014

Kapasitasaun ba Grupu Traballu Jéneru Distrital kona-ba Abordajen Integrada Jéneru

Sekretaria Estadu ba Promosaun Igualdade (SEPI) haruka Grupu Traballu Distritál (GTJD) ba Jakarta, Indonesia hodi hala’o estudu kona-ba Abordajen Integrada Jéneru. Atividade ne’e nu’udar implementasaun husi planu SEPI hodi aumenta końesimentu GTJD sira ba hala’o sira-nia kna’ar. Presidente GTJD nen mak partisipa iha atividade ne’e, hanesan husi Distritu Aileu, Baucau, Bobonaro, Ermera, Manufahi, no Oecussi. Delegasaun husi SEPI ne’e hala’o estuda ka tuir treinamentu kona-ba Abordajen Integrada Jéneru iha Kementerian Pemberdayaan Perempuan dan Perlindungan Anak (KPPPA) ka Ministériu Hakbiit Feto no Protesaun Labarik Indonesia.

Diretór Nasionál Polítika Dezenvolvimentu Jéneru Sr. Henrique da Silva ne’ebé lidera delegasaun ba Jakarta hato’o katak planu SEPI nia realiza para bele kapasita Presidente GTJ Distritál sira hodi lidera grupu sira-nia hala’o sira-nia kna’ar. “Tuir loloos SEPI atu haruka Presidente GTJD husi distritu 13 Timor-Leste tomak, maibé haree mós ba preokupasaun Presidente GTJD sira ne’ebé mak asume kargu mós nu’udar Sekretáriu Distritu iha ida-idak nia distritu. Tanba ne’e SEPI sei fahe ba grupu rua, ba dala uluk ami haruka distritu neen, depois mak haruka distritu hitu,” katak Sr. Henrique da Silva.

Delegasaun aranka husi Timor-Leste iha loron 21 Setembru 2014, no treinamentu iha loron 22 Setembru to’o loron 28 Setembru. Iha abertura treinamentu ne’e, Xefe Biro Planeamentu Ministériu Hakbiit Feto no Protesaun Labarik Sra. Valentina Ginting hato’o katak Indonesia ho Timor-Leste servisu hamutuk ona iha área barak, inklui servisu hamutuk entre SEPI ho ninia ministériu. “Servisu hamutuk ne’e hahú kleur ona liuhusi asina Memorandum of Understanding (Karta Entendimentu) entre Sekretária Estadu (Sra. Idelta Maria Rodrigues) no Ministra (Sra. Linda Gumelar) tinan hirak liu ba. Ami espera iha tinan oin mai bele mós haluan servisu hamutuk ne’e iha área Monitorizasaun no Avaliasaun iha nivel nasionál no mós distritál,” katak Sra. Valentina Ginting.

Entretantu iha abertura ne’e Diretór DNPDG SEPI Sr. Henrique da Silva esplika ba reprezentante Ministériu Hakbiit Feto no Protesaun Labarik Indonesia katak iha Timor-Leste, forma ona Grupu Traballu Jéneru iha nivel nasionál iha kada Ministériu/Sekretaria Estadu no nivel Distritál iha kada Distritu.

Treinamentu kona-ba Abordajen Integrada Jéneru ne’e fasilita husi PATTIRO, servisu hamutuk ho Ministériu Hakbiit Feto no Protesaun Labarik, ho formadór na’in rua hanesan Sr. Agus Salim no Sr. Wawanudin.

Partisipante husi Distritu Aileu Sr. Fausto do Carmo Mendonça hatete katak, “Iha loron primeiru tuir formasaun ne’e hau sente difikuldade barak hanesan lingua Indonesia ne’bé mak cada ves ita atu ko’alia arraska, maske ita rona saida mak sira ko’alia. Maibé iha mós nia di’ak, tanba aumenta ona ami nia końesementu kona-ba Gender Mainstreaming.” Tuir Sr. Mendonça materia ne’ebe sira hetan sei ba fo fali ba Grupu Traballu Jéneru iha idak-idak sira-nia distritu.

Iha treinamentu ne’e atraves simu materia iha sala kona-ba Abordajen Integrada Jéneru, partisipante sira mós hala’o vizita ba Ministériu balun, mak hanesan Badan Perencanaan Pembangunan Nasional (BAPPENAS) no Kementerian Pekerjaan Umum (PU) atu nune’e partisipante sira bele haree direta servisu no planu ne’ebé mak Governo Indonesia hala’o para sira bele kompriende di’ak liután kona-ba Abordajen Integrada Jéneru.


Departamentu Media SEPI | Author : Elizeu
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255496

Ohin loron : 44
Hits ohin loron : 324
Total : 52783
Hits : 255496
Online : 2