» Notisias

Segunda, 15 Jullu 2015

Implementasaun Programa Departamentu Lejislasaun iha Trimestre Daruak 2015

Iha tremestre daruak (April-Juñu) tinan 2015, Departamentu Lejislasaun Sekretaria Estadu ba Apoiu no Promosaun Sosiu-Ekonómika Feto (SEM) hala’o knaar lubuk ida relasiona ho ninia mandatu no ba apoiu departamentu seluk SEM nian.

Kona-ba Abordajen Integrada Jéneru, Departamentu Lejislasaun halao formasaun ba formadór (training of the trainers – ToT) ba Ministériu sira nu’udar SEM nia apoiu ba Ministériu/Sekretaria Estadu sira para bele aumenta sira-nia kapasidade ba implementa Abordajen Integrada Jéneru.

Departamentu Lejislasaun fó apoiu ba Departamentu Ligasaun hala’o kolokiu (workshop) ba Liña-Ministériu sira kona-ba oinsa integra asuntu jéneru iha ida-idak sira-nia Planu Asaun Anuál ba tinan 2015. Workshop ne’e hala’o ba Ministériu/Sekretaria Estadu walu (8), hanesan: Ministériu Administrasaun Estatál, Ministériu Agrikultura no Peskas, Ministériu Edukasaun, Ministériu Interior, Ministériu Justisa, Ministériu Obras Públika, Transporte no Komunikasaun, Ministériu Saúde, no Ministériu Solidariedade Sosiál.

Ba implementa Planu Asaun Nasionál ba Violénsia Bazeia ba Jéneru (PAN VBJ), Departamentu Lejislasaun hala’o reuniaun ho “entidade implementador” sira, hanesan: Ministériu Saúde, Ministériu Solidariedade Sosiál, Ministériu Edukasaun, Polísia Nasionál Timor-Leste (PNTL), no Ministériu Justisa. Reuniaun ne’e hala’o hodi haree fila fali implementasaun PAN VBJ ho objetivu atu halo revizaun. Iha reuniaun ne’e deside katak revizaun sei hein avaliasaun ba implementasaun PAN VBJ ne’ebé sei halo husi peritu espesiál.

Departamentu Lejislasaun fó apoiu ba vítima ida husi asediu seksuál iha Ermera para hetan ninia direitu. Vítima ne’e hetan asediu husi pesoál saúde wainhira hala’o ninia knaar atende pasiente. Kazu ne’e hetan tiha ona rezaun positivu husi Ministériu Saúde ne’ebé hala’o sansaun ba pesoál saúde refere. Vítima rasik hetan ona tratamentu médiku no mós apoiu psikososiál husi PRADET.

Atu sensibiliza kona-ba Lei Kontra Violénsia Doméstika ba instituisaun governu, Departamentu Lejislasaun hala’o aprezentasaun ba Sekretaria Estado ba Polítika FOrmasaun Profisionál no Empregu (SEPFOPE). Iha atividade ne’e, esplika mós konseitu baziku sira para partisipante sira bele kompriende luan tan LKVD.

Atu hakbiit partisipasaun feto iha polítika, SEM fó apoiu ba Asosiasaun Feto Munísipiu iha Timor-Leste tomak, para sira bele prepara feto ba partisipa iha nivel munisípiu. Iha trimestre daruak ne’e, Departamentu Lejislasaun fó apoiu ba Asosiasaun Feto Munísipiu 12 hodi prepara sira-nia dokumentu ba rejistu iha Notariadu Ministériu Justisa.

Departamentu Lejislasaun mós ajuda Asosiasaun Feto sira halo revizaun ba sira-nia esbozu estatutu, para Notariadu bele hal rejistu. To’o fulan Juñu, asosiasaun ida deit mak konsege hetan legalidade liu husi rejistu ne’e, maka Feto Asaun ba Dezenvolvimentu Aileu (FADA).

Atividade kompletu ne’ebé Departamentu Lejislasaun hala’o durante semestre daruak 2015 bele hare’e iha Publikasaun Dokumentus ho naran "Aktividades_IITrimestre_Dep_Lejislasaun".


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270121

Ohin loron : 31
Hits ohin loron : 166
Total : 56222
Hits : 270121
Online : 5