» Notisias

Kinta, 14 Maiu 2015

Prepara Grupu Traballu Jéneru Ministérial sira ba Planu Asaun Anuál 2015

Mandatu bo’ot ida husi Sekretaria Estadu ba Apoiu no Promosaun Sosiu-Ekonómika Feto maka oinsa atu sensibiliza instituisaun governu sira ba asuntu jéneru para sira bele implementa Abordajen Integrada Jéneru nu’udar instrumentu polítika ida ba realiza igualdade jéneru iha Timor-Leste. Nu’udar atividade implementasaun ba mandatu ida ne’e SEM hala’o atividade hodi apoiu ba Ministériu/Sekretaria Estadu sira para sira bele hala’o planeamentu no orsamentu ne’ebé sensivel jéneru bainhira halo Planu Asaun Anuál (PAA).

Ba apoiu Ministériu/Sekretaria Estadu sira hala’o planeamentu ba tinan 2016, SEM organiza workshop Orsamentu Sensivel Jéneru ba Ministériu/Sekretaria Estadu hamutuk 8 (walu) hodi prepara sira ba hala’o planeamenu no orsamentu sensivel jéneru ba Planu Asaun Anuál 2016. Workshop ida ne’e hala’o loron ida ba kada Ministériu/Sekretaria Estadu ida, hanesan: Ministériu Administrasaun Estatál, Ministériu Agrikultura no Paskas, Ministériu Edukasaun, Ministériu Interior, Ministériu Justisa, Ministériu Saúde, Ministériu Solidariedade Sosiál, no Sekretaria Estadu ba Polítika Formasaun Profisionál no Empregu (SEPFOPE).

Workshop ne’ebé hahú husi loron 5 Maiu 2015 to’o 13 Maiu 2015 ne’e nia objetivu maka: a) Aumenta końesimentu kona-ba Abordajen Integrada Jéneru; b) Aprende métodu ba dezenvolvimentu planu anuál ne’ebé sensivel jéneru ba tinan 2016; c) Aumenta końesimentu kona-ba oinsa integra asuntu jéneru iha planu, programa, no orsamentu estadu; d) Aprende oinsa hatama indikadór ne’ebé bazeia ba dadus dezagregadu sexu.

Partisipante ba workshop ne’e mak membru husi Grupu Traballu Jéneru kada Ministériu/Sekretaria Estadu, inklui mós Diretor/a Jerál, Diretor/a Nasionál no Xefe Departamentu sira. Balansu jéneru husi partisipante sira mak: Ministériu Administrasaun Estatál: feto 23 no mane 7; Ministériu Agrikultura no Peskas: feto 43 no mane 7; Ministériu Edukasaun: feto 22 no mane 8; Ministériu Interior: feto 8 no mane 12; Ministériu Justisa: feto 19 no mane 11; Ministériu Saúde: feto 13 no mane 14; SEPFOPE: feto 8 no mane 12.

Fasilitadór ba workshop ne’e maka: Sra. Lorrain Corner no Joăo husi UN Women, Sra. Odilia Martins Ung (Dept. Ligasaun SEM), Jerónimo Lemos (Dept. Ligasaun SEM), no Sra. Mena Babo (Departamentu Formasaun SEM).

Tópiku ne’ebé aprende husi workshop ne’e mak: a) Termu xave sira: konseitu abordajen integrada jéneru, igualdade jéneru, orsamentu sensivel jéneru; b) Enkuadramentu nasionál no internasionál ba jéneru: Relatóriu CEDAW no Observasaun Finál husi Komité CEDAW; c) Idenfika problema prinsipál jéneru iha setór relevante (Avaliasaun Jéneru Nivel Nasaun no Relatóriu CEDAW); d) Identifika solusaun ba problema jéneru iha setór relevante: Prosesu Abordajen integrada jéneru iha Planu Asaun Anuál (PAA), ne’ebé inklui estuda Lista-revista jéneru (Gender check-list) no Prosesu oinsa asegura planu ne’ebé sensivel jéneru.

Liu husi workshop ida ne’e, SEM espera katak Ministériu/Sekretaria Estadu sira iha ona końesimentu konkretu kona-ba oinsa implementa polítika Abordajen Integrada Jéneru (AIJ) iha planeamentu no orsamentu anuál. Tinan-tinan SEM (uluk SEPI) halo analiza ba PAA kada Ministériu/Sekretaria Estadu sira iha prosesu Orsamentu Jerál Estadu molok Governu hato’o ba Parlamentu Nasionál. Ida ne’e atu asegura katak asuntu jéneru ka nesesidade no interese feto konsidera iha programa no atividade kada Ministériu/Sekretaria Estadu. Analiza ne’e hatudu katak planu sira ladauk sensivel ba jéneru, katak interese no nesesidade feto sira ne’ebé la hanesan ho mane sira ladauk hetan konsiderasaun.

Observasaun husi SEM hatudu katak Grupu Traballu Jéneru sira iha ona końesimentu jerál kona-ba asuntu jéneru, katak iha ona końesimentu kona-ba diferensa nesesidade, interese no hanoin entre feto ho mane ne’ebé tenke konsidera para sira hetan tratamentu igual, katak feto no mane sira bele hetan benefisiu igual husi atividade no programa Ministériu/Sekretaria Estadu sira. Maibé Grupu Traballu Jéneru sira sei falta końesimentu tékniku konkretu oinsa implementa AIJ iha planeamentu no orsamentu ba sira nia PAA tinan-tinan, inklui mós oinsa hala’o monitorizasaun no avaliasaun ba implementasaun atividade no programa sira.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270002

Ohin loron : 5
Hits ohin loron : 47
Total : 56196
Hits : 270002
Online : 1