» Notisias

Segunda, 17 Agostu 2015

Formasaun Jestaun Negosiu no Kontabilidade ba Grupu Feto no Emprezaria

Hakbiit ekonomia feto mak prioridade ida husi Sekretaria Estadu ba Apoiu no Promosaun Sosiu-Ekonómika Feto (SEM) iha Governu Konstitusionál VI. Tanba ne’e atividade importante ida husi SEM mak kapasita ba empresaria feto no grupu feto ne’ebé hala’o negósiu kiik sira.

Ba programa hakbiit ekonomia feto ne’e, iha trimestre datoluk tinan 2015 ne’e SEM hala’o formasaun kona-ba “Jestaun Negósiu no Kontabilidade” durante loron haat, hahú husi loron 17 to’o loron 20 fulan Agostu tinan 2015. Atividade ne’e hala’o iha salaun Sentro Treinamentu João Paulo II, Comoro, Dili.

Partisipante ba formasaun ne’e mak hamutuk ema na’in 43 ne’ebé ema na’in 11 husi grupu feto sira benefisiáriu husi Fundu Transferénsi Públika SEM nian no 32 husi kompaña sira.

Abertura ba atividade ne’e halo husi Diretora Jerál SEM Sra. Maria José Sanches. Durante loron haat ne’e, partisipante sira sei simu formasaun kona-ba tópiku oi-oin relevante ho objetivu atu aumenta sira-nia kapasidade kona-ba jestaun negósiu no kontabilidade. Prezidente BNCTL (Banco Nacional Comercio Timor-Leste) Sr. Brigido de Sousa esplika kona-ba prosesu kréditu ka liña kréditu. Presidente (interino) Ajénsia Espesializada Investimentu (AEI) Sr. Arcanjo da Silva sei esplika polítika governu kona-ba investimentu no programa husi AEI. Diretór Ezekutivu SERVE Sr. Florencio Sanches hato’o introdusaun kona-ba mandatu no atividade husi SERVE. Diretór Ezekutivu husi Instituto de Apoio ao Desenvolvimentu Empresarial (IADE) Sr. Hernani Viterbo Soares hato’o tópiku kona-ba “cash flow” ka osan tama no osan sai no “balance sheet”.

Partisipante sira mós sei simu tópiku sira seluk ne’ebé relevante ho sira-nia atividade, hanesan kona-ba legalidade empreza, oinsa hahú investimentu iha Timor-Leste, jestaun ezekusaun orsamentu, no seluk-seluk tan, ne’ebé prepara husi IADE.

Atividade formasaun Jestaun Negósiu no Kontabilidade ne’e hala’o dala rua ona husi Departamentu Apoiu no Promosaun Sosiu-Ekonómika Feto SEM kolobora ho IADE.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270150

Ohin loron : 32
Hits ohin loron : 195
Total : 56223
Hits : 270150
Online : 2