» Notisias

Segunda, 11 Outubru 2015

Selebrasaun Loron Internasionál Feto Rurál 14-16 Outubru 2015: Rekońese Feto nia Papel ba Dezenvolvimentu no Seguransa Ai-han

Sekretaria Estadu ba Apoiu no Promosaun Sosiu-Ekonómika Feto (SEM) hamutuk ho MInistériu Agrikultura no Peskas sei hala’o selebrasaun Loron Internasionál Feto Rurál iha Maubisse iha husi loron 14 to’o 16 Outubru 2015. Iha selebrasaun ho tema “Rekońese Feto nia Papel ba Dezenvolvimentu Rural no Seguransa Ai-han” ne’e sei partisipa Primeiru Ministru Dr. Rui Maria de Araújo.

Selebrasaun ne’e hala’o ho atividade oi-oin. Iha loron 14 Outubru 2014 atividade hahú ho vizita Primeiru Ministru ba grupu sira ne’ebé hala’o prátika di’ak hakbiit ekonomia feto . Iha loron daruak sei hala’o Diálogu no Kolókiu ho tema “Rekońese Feto nia Papel ba Dezenvolvimentu Rurál no Seguransa Ai-han”. Atividade ne’e atu fahe eseriénsia ka prátika di’ak kona-ba hakbiit ekonomia feto rural liuhusi setór agrikultura, atu informa kona-ba polítika Governu kona-ba hakbiit ekonomia feto rural, no fasilita feto agrikultura no funsionáriu Governu iha diálogu ne’ebé sei ajuda hodi identifika asaun konkreta.

Iha diáolgu ne’e, sesaun kona-ba Prátika Di’ak kona-ba Dezenvolvimentu Feto Rurál no Intervensaun Governu ba Hakbiit Ekonomia Feto Rurál sei aprezenta Grupu agrikultór produtor Fini no Timor Global. Vise Ministru Agrikultura no Peskas Sr. Marcos da Cruz sei ko’alia kona-ba “Polítika Ministériu Agrikultura no PEskas ba Feto iha Área Rurál.” Sekretária Estadu ba Apoiu no Promosaun Sosiu-Ekónomia Feto Sra. Veneranda Lemos sei hato’o “Estratéjia Hakbiit Ekonomia Feto SEM”. Husi rai liur, Sr. Patrick Arioka sei hato’o “Prátika Di’ak kona-ba Dezenvolvimentu Rural iha Setór Agrikultura no Asesu ba Merkadu iha Pacific Islands.”

Iha sesaun kona-ba Koordenasaun nu’udar Xave ba Dezenvolvimentu Sustentavel, Ministra Saude Sra. Maria do Céu Sarmeto Pina da Costa sei hato’o “Estratéjia Xave Hasoru Malnutrisaun. Grupu GFKM Letefoho (manan-na’in Premiu Notrisaun 2015) sei ko’alia kona-ba “Hakbiit Ekonomia no Luta Hasoru Malnutrisaun”. Grupu Halibur (Aileu) sei hato’o sira-nia esperiénsia serivisu hamutuk grupu feto iha Aileu.

Espozisaun produtu lokál sei hala’o iha loron 15-16 Outubru 2015 ho partisipante 50 grupu agrikultór no grupu feto ne’ebé kaer metin prinsípiu igualdade jéneru no kontribui ba rendimentu no nutrisaun familiar. Objetivu espesífiku husi espozisaun ne’e mak atu fó espasu ba grupu sira hodi bele hatudu sira-nia produtu no atu partisipante sira bele aprende malu no hetan inspirasaun husi grupu sira seluk kona-ba oinsá dezenvolve sira-nia grupu no atividade.

Iha loron ikus sei hala’o Kompetisaun Te’in Hahán ho Nutrisaun ho objetivu atu partisipante sira, liu-liu inan feto sira bele prepara di’ak liután ai-hán ho kualidade no notriasaun di’ak.

Bazeia ba desizaun husi Primeiru Ministru, Komisaun Organizadora ba selebrasaun ne’e kompostu husi: Ministériu Agrikultura no Peskas nuudar Prezidente, Sekretaria Estadu ba Apoiu no Promosaun Sosiu-Ekonómika Feto (SEM) nuudar Vise Prezidente , no Ministériu Administrasaun Estatal, Ministériu Edukasaun, Ministériu Komérsiu, Indústria no Ambiente, Ministériu Saúde, Ministériu Turismu, Arte no Kultura, no Sekretaria Estadu ba Polítika Formasaun Profisionál no Empregu. Komisaun Organizadora mós hetan apoiu tékniku husi Rede Feto Timor-Leste no UN Women.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270134

Ohin loron : 31
Hits ohin loron : 179
Total : 56222
Hits : 270134
Online : 1