» Notisias

Segunda, 01 Agostu 2016

Vizita Estudu kona-ba Integra Programa Violensia Bazeia ba Jéneru iha Setór Saúde

Diretora Jerál SEM Sra. Maria José Sanches hamutuk ho ekipa ida husi Ministériu Saúde no UNFPA hala’o vizita estudu ba Sri Lanka hodi haree oinsa nasaun ne’e integra programa halakon Violénsia Bazeia ba Jéneru iha setór Saúde. Vizita estudu ne’ebé hala’o husi loron 25 to’o 28 Jullu 2016 ne’e organiza husi UNFPA, WHO no Ministériu Saúde RDTL.

Ekipa vizita estudu ne’e lidera husi Ministériu Saúde no kompostu husi totál ema na’in sia: Ministériu Saúde na’in lima (5), UNFPA na’in rua (2), PRADET na’in ida (1), no SEM na’in ida (1).

Objetivu husi vizita estudu ne’e mak atu foti lisaun husi esperiénsia Sri Lanka nian kona-ba institusionalizasaun Kuidadus ba Violénsia Bazeia ba Jéneru iha Sistema Saúde Públika nian, rekoñese prátika sira diak, ein partikular estabelese posto servisu (fatin hakmatek) Iha ospitál públiku/estadu nian. Vizita ne’e nia objetivu espesífiku maka atu haree ba estebelesimentu resposta ba Violénsia Bazeia ba Jéneru iha Sri Lanka liu husi setór Saúde.

Durante loron haat nia laran ekipa husi Timor-Leste hetan asisténsia husi reprezentante ida Ministériu Saúde Sri Lanka, Dr. Lakshman Senanayake (mane) no reprezentante ida husi Ministériu ba Asuntu Feto no Labarik, Dr. Nathanajali Mapitigama (feto).

Ekipa hasoru malu ho Diretór Jerál Ministériu Saúde no Ministériu Asuntu Feto no Labarik, nune’e mos ho Diretór sira ba Uma Hakmatek (Mithuru Pryasa/Naptuni Layan) iha Ospitál Colombo, no ospital munisipál: Ospitál Wiranata no Ospitál Awwisala.

Hafoin hasoru malu tiha ho kada entidade relevante, ekipa husi Timor-Leste mós iha oportunidade atu halo vizita ba Fatin Hakmatek iha ospitál sira ne’e hodi observa diretamente sistema atendimentu, inklui partisipa mós iha reuniaun mensal mekanizmu referál ne’ebé envolve servisu multi setoral sira (ajénsia setór saúde no non-saúde) no vizita ba temporary shelter (uma mahon temporária) ne’ebé jere husi Ministériu Asuntu Feto no Labarik.

Husi vizita estudu ne’e, ekipa husi Timor-Leste aprende lisaun kona-ba oinsa problema VBJ ne’e intregra iha sistema saúde, kona-ba oinsa sentru atendimentu violénsia bazeia ba jéneru/fatin hakmatek hetan fatin espesífiku iha ospitál, no oinsa liña koordenasaun entre Ministériu Saúde no Minnistériu Asuntu Feto no Labarik la’o diak tebes.

Tuir Diretora Jerál Sra. Maria José Sanches ba futuru entre Timor-Leste sei hala’o kolaborasaun iha área ne’e. Ministériu Saúde Timor-Leste no Ministériu Saúde Sri Lanka sei asina Karta Entendimentu ida ba kapasitasaun/formasaun medikus/tekniku sira iha área Violénsia Bazeia ba Jéneru inklui forensika.

Ministériu Saúde sei harii “steering committee” ida hodi koko aplika lisaun diak ne’ebé aprende iha Sri Lanka ba iha sistema saúde iha Timor-Leste. Ministériu Saúde sei dezenvolve Planu Asaun ida ba implementasaun rezultadu husi vizita estudu ne’e, ne’ebé draft planu asaun halo tiha ona iha loron ikus vizita estudu no aprezenta tiha ona iha sesaun debriefing no enseramentu ne’ebé partisipa husi Country Representative UNFPA no Diretór Jerál Ministériu Saúde. Ekipa vizita estudu ne’e sei realiza reuniaun nível as ida iha loron 26 Setembru 2016 hodi fahe esperiénsia no informasaun ba entidade/autoridade sira iha Timor-Leste.

Sra. Maria José Sanches mós hatete katak programa vizita estudu ne’e la’o diak no organizadu diak tebtebes. “Programa sira ne’ebé ami ekipa tuir no observa, iha Timor-Leste mós implementa dadaun ona,” katak Sra. Maria José Sanches. “Maibé diferensa bo’ot maka Fatin Hakmatek eziste iha ospitál estadu nian no tama tiha ona iha Sistema Saúde Governu nian, enkuantu ke iha Timor-Leste, Fatin Hakmatek sira ONG sira maka ka’er.”

Tuir Diretora Jerál SEM, ekipa husi Timor-Leste aprende lisaun barak ne’ebé Ministériu Saúde Timor-Leste bele aproveita hodi konsidera iha Sistema Saúde Timor-Leste, maske rekoñese katak la fásil no sistema iha Sri Lanka dezenvolvidu tinan lubun bo’ot ida tiha ona no sira rasik sei sente difikuldade barak.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270057

Ohin loron : 30
Hits ohin loron : 102
Total : 56221
Hits : 270057
Online : 1