» Notisias

Kuarta, 07 Novembru 2016

Semináriu Nasionál Feto iha Funsaun Públika

Semináriu Nasionál Feto iha Funsaun Públika

Dili-Comissão da Função Públika (CFP)no Sekretaria Estadu ba Apoiu no Promosaun Sosiu-Ekonómik Feto ( SEM ) organiza semináriu Nasionál ho tema “ Feto Iha Funsaun Publika.” Semináriu ne’e realiza iha edifísiu Ministériu Negosiu Estrangeiru no Kooperasaun (MNEK), Dili, Segunda-feira, 7 Novembru 2016.

Semináriu ida ne’e mós hala’o iha ámbitu komemorasaun Loron Nasionál Feto ne’ebé monu iha loron 3 fulan Novembru tinan 2016. Tuir planu SEM, Loron Nasionál ne’e sei selebra iha Suku Tapo, Postu-Administrativu Bobonaro iha Kinta-feira, 10 Novembru 2016.

Liu husi komemorasaun ne’e, atu fó ónra mós ba feto maluk ne’ebé kontribui ba luta ukun rasik an nune’e jerasaun foun sira bele hatutan hodi dezenvolve Timor-Leste.

Semináriu ne’e atu sesinsibiliza isu igualdade jéneru iha Funsaun Públika tanba dadus iha funsaun públika hatudu katak total husi funsionáriu públika iha Timor-laran tomak mak 34 mil tal.

Iha lia menon husi Prezidente Komisaun Funsaun Públika Sr. Faustino Cardoso, fó apresiasaun ás tebes ba partisipante sira hotu no tuir mai Sra Domingas Fernandes Alves hat’o tópiku jerál ba Semináriu ne’e.

Semináriu nasionál ne fahe ba parte rua. Oradór sira ba parte dahuluk mak, Ministro do Estado Coordenador dos Assuntos da Administração Estatal Sr. Dinísio Babo Soares, Sekretária Estadu ba Apoiu no Promosaun Sosiu-Ekoknómika Feto Sra. Veneranda Lemos no Inacia da Conceição Texeira reprezentate husi ZEEMS ho moderadór Dr. Miguel.

Iha parte daruak moderadór maka Sra. Olandina Caiero, palestrante ba seksaun segundu mak palestrante Sra. Aurora Ximenes ho tema cargu lejislasaun, palestrante Sr. Faustino Cardoso Prezidente Komisaun Funsaun Públika ho tema Feto iha cargu no xefia iha funsaun públika.

Antes hahú aprezentasaun, Sra. Veneranda Lemos iha nia palestra ho tópiku pólitika da abordajem género no perspektiva deskonsentrasaun apresia ba pensamentu Funsaun Públika hodi bele halo Semináriu Nasionál Feto.

“Luta atu hametin partisipasaun feto hahú kedas iha ailaran, ohin loron nasaun hetan independénsia ita iha enkuadramentu legál lubuk ida ne’ebé maka hatudu mós feto iha pozisaun ida ne’ebé sai mós responsabilidade ita hotu nia.

Liu husi feto nia luta no feto nia sakrifísiu, ohin loron Funsaun Públika bele fó sai númeru feto sira ne’ebé tur iha diresaun ka xefia. Feto Timor, feto ne’ebé matenek, desde uluk kedas, iha mundu internasionál koñese katak feto Timor ne’e brani no 38% feto mak partisipa iha vida pólitika.

Feto iha korajen atu partisipa iha dezenvolvimentu nasionál tanba nasaun ida ne’e tau Abordajen Integradu Jéneru,” hatete Sra. Veneranda iha nia aprezentasaun.

Objetivu husi semináriu nasionál ne’e atu fó oportunidade ba governantes, lideres, péritus no partisipantes sira hotu atu hato’o sira nia intervensaun, sujestaun no opiniaun kona-ba Feto iha Funsaun Públika.

Iha biban ne’e mós Prezidente Komisaun Funsaun Públika atribui destinsaun prémius ba funsionáriu públiku nain neen.


Departamentu Media SEPI | Author : Estudante Estajiariu Komunikasaun UNTL
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255454

Ohin loron : 43
Hits ohin loron : 282
Total : 52782
Hits : 255454
Online : 10