» Notisias

Kuarta, 18 Janeiru 2017

Kapasitasaun Polísia Feminina Kona-ba Lideransa Sensivel ba Jéneru

Sekretaria Estadu ba Apoiu no Promosaun Sosio-Ekonómika Feto (SEM) liu husi Departementu Formasaun hala’o Formasaun kona-ba Igualidade Jéneru ba Polísia Feminina husi Munisípiu sanulu resin rua (12) inklui Reziaun Administrativa Espesiál Oe-Cusse Ambeno (RAEOA) iha Salaun Maria Gorrete – SEM, Caicoli, Dili durante semana ida hahú 16 -20 Janeiru 2017.

Formasaun ne’e la’ós foin mak hala’o maibé formasaun ne’e hanesan ona Programa rutina Departementu Formasaun SEM nian ne’ebé hala’o tinan-tinan ba Polísia Feto sira iha Territóriu Timor-Leste. Matéria ba formasaun ne’e mak Lei kontra Violénsia Doméstika, Jéneru Báziku, Analiza Jéneru, Prátika Analiza Jéneru, Public Speaking no Konvensaun Halakon Deskriminasaun Oin-oin Hasoru Feto (CEDAW) no Rezolusaun Konsellu Seguransa ONU 1325 kona-ba Feto, Paz no Siguransa.

Objetivu husi formasaun ne’e atu hasa’e kapasidade PNTL Feminina sira oinsá hala’o atendementu ne’ebé diak ba komunidade kona-ba igualidade jéneru.

Iha Abertura ba Formasaun ne’e Diretór Jerál SEM Sr. Armando da Costa hateten formasaun ne’e hanesan parte ida atu hasa’e koñesementu no kapasidae Polísia Feminina sira nian atu oinsá hala’o atendimentu ba komunidade liu-liu inan feto sira ne’ebé sai vítama ba dezigualdade Jéneru nune’e mós hadia prátika servisu liu-liu kona-ba asuntu igualidade jéneru iha institusaun PNTL rasik.

“Ema hotu- hotu sempre hakarak fó atendimentu ida ne’ebé diak, kuandu atendimentu diak sosiedade kontenti, ita nu’udar PNTL mós satifaz” esplika Diretur Jerál SEM Sr. Armando da Costa.

Diretur Jerál mós hatutan liu husi formasaun hanesan ne’e bele fahe esperiénsia hamtuk hodi hadia fila fali servisu sira ne’ebé akontese iha terenu karik ses husi polítika estadu nia kona-ba lei no ordem liu-liu kona-ba asuntu jéneru ne’ebé adopta iha Timor-Leste.

Iha biban ne’e, Xefe Seksaun Investigasaun, Sarjentu Bernadete de Asis Belo husi PNTL Feminina Eskuadra Baucau hato’o mós preukupasaun kona-ba dezigualdade jéneru ne’ebé akontese iha intitusaun PNTL Eskuadra Baucau. “Partisipasaun feto iha seksaun importantes sira iha PNTL Baucau kona-ba servisu hirak ne’ebé tuir lolos PNTL feminina iha institusaun refere mós bele halo maibé komando la fó fiar atu halo knaar importane sira ne’e.

“Ami PNTL iha munisípiu baucau ne’e devisa bo’ot liu mak Sarjentu Xefi no koalia kona-ba jéneru liu-liu ba feto, durante ne’e ami mós husu tanba sa mak feto ne’e la promove iha kada seksaun sira? Maibé informasaun ne’ebé ami rona dehan kapasidade ba feto ladun no preparasaun fíziku sidauk diak atu bele halo kanaar importa sira, ezemplu hanesan kaer pistola, ne’e feto sidauk prontu tanba hareee situasun Baucau nian ladun diak kompara ho munisípiu seluk tanba ne’e mak buat barak mane deit mak halo,” esplika Sarjentu Bernadete de Aiss Belo.

Relasiona ho preokupasaun ne’e Sekretária Estadu ba Apoio no Promosaun Sosiu-Ekonómika Feto Sra. Veneranda Lemos rekoñese, iha instituisan PNTL mane mak domina tanba mane ladún fó fiar ba feto atu halo kna’ar importante sira. “Tanba ne’e Liu husi formasaun hanesan ne’e bele kapasita PNTL feminina sira atu nune’e bele hetan fiar husi mane atu halo kna’ar importante sira iha institusaun ne’ebé sira hala’o kna’ar ba,” katak Sra. Verenanda Lemos.

Sekretária Estadu ne’e mós hatutan Polísia Feminina sira mak tenke kria igualdade jéneru iha instituisaun ne’e. “Imi mak tenke luta atu kria igualdade jéneru, maibé imi tenke unidade. PNTL feminina mós tenke tane malu no ajuda malu, tanba wainhira la haree malu iha susar nia laran, hamonu mentalidade ema nian,” Hatutan Sra. Veneranda Lemos wainhira hasoru malu ho PNTL feminina iha formasaun, iha Salun Maria Gorete, SEM, 17 Janeiru 2017.

Maske ladun hetan fiar husi PNTL mane maibé, nuudar Xefe Seksaun Investigasun ne’ebé hala’o knaar hanesan halo atendementu ba kazu violénsia doméstika no krime jerál, kuandu iha kazu ruma ne’ebé presiza halo atendementu diretamente iha terenu hanesan halo orientasaun ba vítima sira, ajudu ba vítima kuandu vítima presiza ajuda.

PNTL Feminina husi Munisípiu Baucau ne’e promete sei implementa saida mak nia aprende ona iha nia munisípiu no sei fahe informasaun ne’e ba parseiru feto sira atu ne’e fahe informasaun ba feto ne’ebé mak maioria hetan vítima ba violensia doméstika.

Iha fatin hanesan Komandante Eskuadra Pante Makasar Oe-Cusse Sra, Adelaide Barros hateten katak, “Formasaun ida ne’e hanesan onra boot ida tanba hau haree matérial sira ne’e intersante tebes liliu materiál public speaking ninian, tanba iha ne’eba ami hasoru direta komunidade tanba ne’e importante ba ami. Lei Kontra Violénsia Doméstika hamutuk ho PNTL Feminia sira iha ne’eba ami fó tulun ba vítima sira ba violénsia bazeia ba jéneru no violénsia doméstika.”

Adelaide Barros hatutan tan katak iha iha RAEOA sira sempre halo sorumutu ho feto sira. “Liu husi formasaun hanesan ne’e, hau sei habelar liu tan hau nia membru sira no espera ba future, forma diak liu tan PNTL feminina sira atu sira bele hala’o knaar diak liu tan.

Komandante Eskuadra Pante Makasar ne’e hato’o mós nia mensajen ba kolega PNTL Feminina iha Timor laran tomak atu tau proukupasaun ba asuntu feto ninian no fó atendementu ne’ebé mak espesífiku ba vítima sira ne’ebé maka relasiona ba kazu violénsia bazeia ba jéneru no mós violénsia doméstika ne’ebé mak nia númeru aas iha Timor-Leste.

Treinamento ne’e realiza tanba servisu hamtuk entre SEM, PNTL, Ministériu Interiór, Asia Fundasuan, Timor-Leste Police Development Program (TLPDP) no apoiu husi UN Women.

Fasilitadór ba formasaun ne’e mai husi SEM rasik kompostu husi Xefe Departamentu Formasaun Sra. Filomena Babo, Diretór Jerál, Diretór DNAIGCM, Asesora Abordagen Intergrada Jéneru Sra. Ubalda Alves, Asesora ba asuntu CEDAW Sra. Paula Maia no formadór balun husi Ministériu Solidariedade Sosiál nomós ONG CAUCUS.


Departamentu Media SEPI | Author : Julia Pereira
Loron Boot SEPI
Loron Internasionl Feto RurL
Loron Nasionl Feto Timor
Kampaa Loron 16 Ativismu Kontra Violnsia Bazia ba Jneru
Loron Internasionl Feto
Arkivu
Statistika Vizitantes

270128

Ohin loron : 31
Hits ohin loron : 173
Total : 56222
Hits : 270128
Online : 1