» Notisias

Segunda, 29 Outubru 2012

Sr. Idelta Maria Rodrigues Aprezenta Papel Feto Timor-Leste kona-ba Harii Dame ba iha Nasoens Unidas

Sekretária Estadu ba Promosaun Igualdade Sra. Idelta Maria Rodrigues hato’o palestra kona-ba papel feto iha harii dame iha Timor-Leste ba iha Departamentu Manuntensaun Paz Organizasaun Nasoens Unidas iha Nova Yorke. Panel ho tema “Papel Organizasaun Sosiedade Sivil iha Harii Dame iha Timor-Leste” ne’e halao iha UN North Lawn Building, iha loron 29 fulan Outubru tinan 2012 hodi selebra aniversariu ba dala 12 Rezolusaun Konsellu Seguransa Nasoens Unidas No. 1325 kona-ba Feto, Dame no Seguransa.

Departamentu Manuntensaun Paz ONU konvida SEPI hato’o esperiénsia Timor-Leste tanba feto no mane sira iha Timor-Leste oferese sira-nia abilidade no końesimentu ne’ebé diak kona-ba papel importante husi organizasaun feto sira iha konsolidasaun dame no hadiak seguransa iha komunidade. Feto Timor-Leste mak lidera esforsu ba hakbiit estabilidade no lansa baze ba dame no prospriedade iha nasaun ne’ebé foin hetan ukun aan ne’e.
Iha eventu ne’e, Sekretária Estadu ba Promosaun Igualdade Sra. Idelta Maria Rodrigues koalia kona-ba susesu no dezefiu sira ba ativismu dame feto nian iha Timor-Leste no hato’o rekomendasaun estrátejiku kona-ba oinsa konsolida progresu ne’ebé sira hetan tiha-ona depois ONU remata ninia misaun iha Timor-Leste.

“História movimentu feto iha Timor-Leste relasiona ho harii dame, laos komesa husi Restorasaun Independensia iha tinan 2002. Hari damee ne’e halao molok invasaun Indonesia,” katak Sra. Idelta Maria Rodrigues. Tuir Sekretária Estadu, feto iha papel importante liu ba harii dame. Feto no organizasaun feto sira mós iha końesimentu ne’ebé diak liu ba nesesidade komunidade. To’o agora Governu Timor-Leste no sosiedade sivil hala’o servisu hamutuk iha área oi-oin ba promove igualdade jéneru no hakbitt feto iha Timor-Leste. Atividade oi-oin ne’e mak fó kontribuisan makaas ba harii dame iha Timor-Leste.
“Ami hetan susesu barak, ita mós sei hasoru dezafiu barak. Maiske ami iha historia naruk kona-ba movimentu feto ba harii dame, hahalok patriarkal sei makaas iha ami nia sosiedade, ne’ebé difikulta partisipasaun ativa feto iha rekonstrusaun no dezenvolvimentu,” tenik Sekretária Estadu. Rekursu ba implementa Rezolusaun Konsellu Seguransa 1325 sei limitadu. Maibé SEPI fiar katak aliansa estratéjiku ho sosiedade sivil maka fator importante. “Ho aliansa ne’e ami bele implementa Rezolusaun 1325 hodi bele realiza Visaun SEPI: sosiedade ne’ebé prosperu no dame, ho kultura ne’ebé valoriza, proteze, no promove dignidade no direitu umanu,” katak Sra. Idelta Maria Rodrigues.

Panel “Papel Organizasaun Sosiedade Sivil iha Harii Dame iha Timor-Leste” husi Departamentu Manutensaun Paz ne’e loke husi S.E. Sr. Christian Wenaweser, Reprezentante Parmanente husi Liechtenstein ba Nasoens Unidas. Sr. Wenaweser mós sei hatoo introdusaun no mós sei sai nu’udar moderador ba eventu ne’e. Orador ba eventu ne’e hamutuk nain tolu, hanesan: Sekretária Estadu ba Promosaun Igualdade Timor-Leste, Sra. Idelta Maria Rodrigues; Sub-Sekretáriu Jerál Departamentu Manutensaun Paz Nasoens Unidas, Sr. Hervé Ladsous; no Koordenadora Harii Dame APSCTL (Asia-Pacific Support Collective Timor-Leste ka Koletivu Ásia-Pasífika ba Timor-Leste), Sra. Laura Abrantes. Hotu tiha aprezentasaun husi orador nain tolu ne’e, Sub-Sekretária-Jerál no DIretora Exekutivu UN Women (Entidade Nasoens Unidas ba Igualdade Jéneru no Hakbiit Feto) Sra. Michelle Bachelet sei hato’o Observasaun Finál (Closing Remarks).


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

269984

Ohin loron : 5
Hits ohin loron : 29
Total : 56196
Hits : 269984
Online : 1