» Notisias

Sesta, 26 Outubru 2012

Relatóriu CEDAW Timor-Leste kona-ba Saúde no Edukasaun

Foin dadauk ne’e Sekretaria Estadu ba Promosaun Igualdade (SEPI) haruka Relatóriu Espesífiku CEDAW kona-ba Saúde no Edukasaun ba Komité CEDAW (Konvensaun Halakon Forma Hotu-hotu Diskriminasaun Hasoru Feto) iha Nova Yorke.
Relatóriu ne’e hakerek nu’udar resposta ba ezijensia husi Komité CEDAW ne’ebé hato’o iha sira-nia Observasaun Finál ba Timor-Leste, katak iha tempu tinan rua Timor-Leste tenke hato’o informasaun detalladu kona-ba implementasaun rekomendasaun iha área saúde no edukasaun.

Atu hakerek Relatóriu ne’e, SEPI hala’o atividade halibur dadus, ne’ebé hetan apiu husi Ministériu Edukasaun no Ministériu Saúde, liu husi Pontu Fokál Jéneru no Xefe Departamentu sira. SEPI mós simu apoiu husi organizasaun sosiedade sivil sira no ajénsia internasionál relevante sira. Hotu tiha hakerek draft Relatóriu ne’e, SEPI organiza workshop ida iha Hotel Arbiru, Dili, iha loron 23 fulan Novembru ho objetivu atu halibur ideia hodi hadi’ak draft ne’e. SEPI mós hala’o revista ba dokumentasaun oin-oin kona-ba saúde no edukasaun. Hotu tiha finaliza relatóriu ne’e SEPI haruka ba Komité CEDAW iha sidade Nova Yorke, Estadus Unidus Amerika.

Relatóriu ne’e hato’o inisiativa sira husi Governo no organizasaun naun-governamantel sira iha Timor-Leste iha área saúde no edukasaun. Kompila inisiativa ne’e ho objetivu atu hadi’ak liután igualdade jéneru no hakbiit feto liu husi hato’o relatoriu no implementasaun husi Observasaun Finál sira.

Parte dahuluk husi Relatóriu ne’e mak kona-ba saúde ne’ebé hatudu situasaun saúde reprodutivu iha Timor-Leste no resposta husi Ministériu Saúde no parseiru dezenvolvimentu sira ba asuntu ne’e. Parte ne’e kobre saúde seksuál no saúde reprodutivu, saúde inan no kosok-oan sira, servisu atendimentu molok no hotu tiha partu, aborsaun, no infesaun liu husi relasaun seksúal, inklui VIH/SIDA.
Tuir mai mak kona-ba planeamentu familiar, inklui prevensaun ba isin rua sedu no mós edukasaun seksuál ba estudante sira, mortalidade inan, labarik no kosok-oan sira. Iha mós seksaun ida kona-ba saúde mental feto nian, ne’ebé analize kona-ba sistema informasaun jestaun saúde, inklui sistema monitorizasaun no avaliasaun ba setór saúde inklui saúde reprodutivu no planeamentu familiar.

Parte daruak Relatóriu ne’e mak kona-ba edukasaun. Seksaun dahuluk husi parte ne’e mak analize ba feto nia tama edukasaun nível sekundária no nível superiór, no inisiativa husi Ministériu Edukasaun atu hadi’ak situasaun ne’e, inklui bolsu estudu espesiál ba estudante feto sira.

Taxa analfabetu feto nian sei aas iha Timor-Leste, tan ne’e Relatóriu ne’e hakerek kona-ba asuntu ne’e, inklui haree ba programa alfabetizasaun ba feto no eskolarizasaun feto, ne’ebé haree liu ba kauza husi feto para eskola, inklui asuntu seguransa ba feto iha eskola.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270099

Ohin loron : 30
Hits ohin loron : 144
Total : 56221
Hits : 270099
Online : 2