» Notisias

Tersa, 26 Fevereiru 2013

Ambasadór Noruega ba Timor-Leste: Noruega hakarak kontinua apoiu hakbiit feto Timor-Leste

“Hakbiit feto mak importante liu atu kontinua iha Timor-Leste. Tan ne’e ami la’ós deit lee ita bo’ot sira-nia relatóriu, maibé importante ba ami rasik atu vizita no hare diretamente realidade no situasaun ne’ebé feto Timor-Leste sira hasoru,” katak Ambasadór Noruega ba Timor-Leste Stig Ingemar Traavik wainhira vizita Sekretaria Estadu ba Promosaun Igualdade iha loron 26 fulan Fevereiru 2013.

Iha vizita ne’e, Ambasadór Traavik ho ninia komitiva simu husi Sekretaria Estadu Sra. Idelta Maria Rodrigues hamutuk ho diretor sira. Sra. Idelta Maria Rodrigues hatete katak durante ne’e iha difikuldade ruma kona-ba ligasaun entre SEPI ho Embaixadora Nuruega tanba ninia fatin la’ós iha Dili, maibé iha Jakarta (Indonesia). Maske nune’e, SEPI hakarak duni kontinua kooperasaun ne’e. Sekretaria Estadu mós hatoo ninia obrigadu ba apoiu husi Noreuga ba promosaun igualdade no hakbiit feto iha Timor-Leste.

Agora dadauk Timor-Leste halao programa hakbiit kapasidade Universidade Nasionál Timor Lorosa’e (UNTL) iha área estudu jéneru bazeia ba Karta Atendimentu entre SEPI ho UNTL. Governu Noruega bele fó apoiu ba hakbiit universidade ne’e nia matenek kona-ba hala’o peskiza sientifika kona-ba asuntu jéneru. “Ami apoiu ona harii Sentru Estudu Jéneru iha UNTL, Noruega bele epesífiku liu apoiu ba hakbiit sira-nia kapasidade relasiona ho asuntu jéneru, liu-liu kona-ba analize sensivel jéneru ba orsamentu jéral estadu,” katak Sra. Idelta.

Atu hakbiit implementasaun orsamentu sensivel jéneru, Governu Timor-Leste mós harii ona Grupu Traballu Jéneru iha kada Ministériu/Sekretaria Estadu no Distritu. Iha Ministériu sira, Grupu Traballu ne’e lidera husi Diretór Jerál sira no iha Distritu sira lidera husi Ajuntu Administradór Distritu sira. Grupu Traballu Jéneru sira mós sei presiza hakbiit sira-nia matenek no abilidade kona-ba implementasaun orsamentu sensivel jéneru. Noruega mós bele apoiu iha área ida ne’e.

Iha ninia parte, Ambasadór Traavik hato’o katak, entre SEPI ho Embaixadora Noruega bele intensifika reuniaun informal. Agora dadauk Noruega sei kontinua ninia apoiu. Hanesan agora dadauk Noruega fó apoiu ba UNDP, no organizasaun sira seluk ne’ebé hala’o programa ba saúde inan no labarik, no mós fó bolsa de estudo ne’ebé balansu jéneru.

Ambasadór Traavik mós hato’o katak iha tinan ida ne’e Noruega sei selebra tinan 100 direitu veto Noruega ba vota iha eleisaun. “Governu Noruega hakarak konvida Sua Exelensia Sekretaria Estadu ba Promosaun Igualdade atu vizita Noruega ba partisipa iha selebrasaun ida ne’e no mós hodi kontinua hakbiit relasaun entre ita nain rua nia nasaun,” hatete Sr. Stig Ingemar Traavik. Nia mós esplika katak durante iha Noruega, Sra. Idelta Maria Rodrigues bele halo reuniaun ho feto sira Membru Parlamentu, halo vizita ba Palácio, universidade sira, no instituisaun relevante sira seluk.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255487

Ohin loron : 44
Hits ohin loron : 315
Total : 52783
Hits : 255487
Online : 6