» Notisias

Kuarta, 10 Abril 2013

Hamoris filafali valór hirak ne’ebé uluk fó motivasaun ba heroina sira

Ita presiza hamoris filafali valór hirak ne’ebé uluk fó motivasaun ba maluk feto sira ne’ebé halo funu ba ukun-an ida ne’e (heroina sira). Lia fuan hirak ne’e hato’o husi Sra. Isabel Ferreira iha selebrasaun Loron Internasionál ba Feto ne’ebé PDHJ hala’o iha salaun Comissão Nacional das Eleições (CNE) iha Caicoli, Dili.

Tuir Sra. Isabel Ferreira, valór hirak ne’e mak voluntariamente, solidariedade, no toléransia. “Valór sira hanesan halo serbisu voluntariamente, tanba konsege hetan buat boot sira ho vontade no la’ós sempre ho osan. Valor sira kona-ba solidariedade, tanba iha mundu materialismta ida ne’e, ne’ebé ema hothotu podér, posizaun, no osan; ita haluha buat ne’ebé importante liu: ajuda ema seluk, ema sira ne’ebé kiak liu no sira ne’ebé ema haluha.”

Sra. Isabel mós halo observasan katak ita dehan maioria hosi ita ema Katóliku, maibé haluha valór sira kona-ba solidariedade entre ema moris, solidaridade ne’ebé mak Jesus Kristu defende.

“Valor kona-ba toléransia, rekoñese katak ema ida-idak iha direitu ne’ebé hanesan, ne’ebé ita labele hanehan ho ita-nia vontade rasik, maibé tenke buka entendimentu liuhosi dalan diólogu no komunikasaun ba malu,” katak Sra. Isabel Ferreira. Sentimentu ódiu malu ka vingansa, ka ideia kona-ba konfrontasaun direitu entre mane ho feto ne’e mak tenke evita.

“Hamosu mudansa loloos kona-ba ita nia hanoin, hatudu ba sosiedade timorense katak iha faze dezenvolvimentu nasionál oras ne’e daudaun, ne’ebé buka atu harii Timor-Leste ne’ebé riku, forte no seguru. Ida ne’e só bele sai posível ho partisipasaun feto ida-idak, ne’ebé karik halibur malu hamutuk, reprezenta númeru liu metade hosi forsa no potensiál traballu nasionál nian,” tenik Sra. Isabel Ferreira.

Atu taka, Primeira Dama mós hatete katak Timor-Leste hetan ukun-an liuhosi esforsu oioin, no liuhosi envolvimentu ema hothotu nian. “Rekoñese mós katak iha momentu hothotu, feto timorense sira halo parte mós ekopa ida ne’e, ne’ebé lori ita rain ne’e to’o iha vitória finál,” katak Primeira Dama Sra. Isabel Ferreira. Selebrasaun Loron Internasionál ba Feto ne’e hetan partisipasaun husi Membru Governu, Vise Ministra Saúde no Vise Ministra Edukasaun, Membru Parlamentu, Provedor Direitos Humanos e Justiça no Adjunto Provedor Direitos Humanos e Justiça, Embaixador Indonesia ba Timor-Leste, organizasaun sosiedade sivil no feto vítima husi direitus umanus.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255368

Ohin loron : 42
Hits ohin loron : 196
Total : 52781
Hits : 255368
Online : 8