» Notisias

Kuarta, 24 Abril 2013

SEPI Kolabora ho Paz y Desarrollo hodi Promove Feto

Sekretaria Estadu ba Promosaun Igualdade (SEPI) kontinua kolaborasaun ho ajénsia internasionál Paz y Desarollo (PyD) hala’o programa hakbiit feto iha área ekonomia no partisipasaun polítika ne’ebé hala’o ona hahú husi fulan Fevereiru tinan 2011. Ohin loron 23 fulan Abril 2013, iha edifisiu SEPI, Palácio do Governo, Sekretária Estadu ba Promosaun Igualdade Sra. Idelta Maria Rodrigues hamutuk ho Reprezentante PyD Regional Asia Sra. Noelia Monge Vega asina akordu kona-ba kolaborasaun entre instituisaun rua ne’e ba tinan rua tan.

Akordu ne’e sei sai padraun ba kooperasaun no fasilita kolaborasaun entre SEPI no Paz y Desarrollo hodi hakbiit kooperasaun liu husi dialogu, troka esperiénsia, organiza hamutuk atividade espesifiku, partisipa iha atividade espesifiku iha nivel rejionál, nasionál no lokál no mós konsulta no troka materiais treinamentu hodi kontribui ba atinji igualdade jéneru no promove empoderamentu feto.

“Parseria entre SEPI ho PyD iha Timor-Leste hahú tiha ona iha tinan 2010, ohin akordu kontinuasaun ba parseria nee ba tinan rua,” katak Sekretaria Estadu ba Promosaun Igualdade Sra. Idelta Maria Rodrigues. Bazeia ba akordu ne’ebé asina tinan tolu liu ba, PyD halo ona atividade lubuk boot relasiona ho promosaun igualdade jéneru. “Sira foka ba implementasaun CEDAW ba nivel lokál, promove partisipasaun politika feto, no redusaun ba violénsia hasoru feto. Sira mós hala’o atividade ba hakbiit feto iha área ekonomia,” tenik Sekretaria Estadu. Programa PyD ne’e kobre suku 12 iha distritu haat, maka Baucau, Lautém, Manatuto no Viqueque. Suku sira ne’e iha área remotas. Tuir Sekretaria Estadu, PyD konsege halo progresu no fó benefisiu di’ak ba feto, hanesan programa kombate analfabetu, hanorin feto ba administrasaun jestaun, no kapasita feto sira oinsa bele dezenvolve sira-nia suku.

“Bazeia ba akordu ba tinan 2013-2014 ne’e montante orsamentu ba programa promosaun igualdade jéneru mak Euro 1.158.858 no ba programa hakbiit ekonomi no sosial mak Euro 1.930.250,” esplika tan Sra. Idelta Maria Rodrigues. “Orsamentu ne’e la’ós entrega mai Governu Timor-Leste, sira mak implementadora ba programa ne’e,” tenik Sekretaria Estadu.

Iha promgrama promosaun partisipasaun politika husi PyD, Timor-Leste fas parte husi programa regional ne’ebé kobre nasaun Bangladesh, Cambodia, Filipina, Vietnam, no Timor-Leste. “Ami halo sorumutuk lubuk boot iha nivel nasional no rejionál. La kleur Timor-Leste mós sei sai uma nain ba organiza konferénsia rejionál. Nee hanesan troka esperiénsia nasaun lima kona-ba promosaun partisipasaun polítika,” katak Sekretaria Estadu ba Promosaun Igualdade Sra. Idelta Maria Rodrigues.

Entretantu, Reprezentante PyD Rejionál Asia Sra. Noelia Monge Vega hatete katak ba implementasaun programa ne’e, PyD simu apoiu husi Ajénsia Espańa ba Kooperasaun Internasional no Dezenvolvimentu (AECID), ne’ebé hala’o programa ba hakbiit feto iha Asia, hanesan iha nasaun Bangladesh, Cambodia, Filipina, Timor-Leste no Vietnam. Programa ne’e koordena husi Edifisiu Paz y Desarollo Regional Asia no komesa iha fulan Setembru 2010 no remata iha Setembru 2014. “Ami tinan hitu ona hala’o atividade iha Timor-Leste. SEPI mak ami nia parseiru estratéjiku ba atinji ami nia objetivu hakbiit feto no promove igualdade,” tenik Sra. Noelia Monge Vega.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255575

Ohin loron : 2
Hits ohin loron : 42
Total : 52796
Hits : 255575
Online : 2