» Notisias

Kuarta, 12 Juńu 2013

Dialogu Feto Kona-ba Minisipiu

Iha fulan Maiu tinan 2013 nia laran SEPI hamutuk ho Grupu Traballu Jéneru Distritál sira hala’o atividade dialogu ho feto sira iha Distritu balun, ho objetivu atu fasilita feto sira hodi prepara sira-nia aan ba munisipiu ne’ebé Governu sei instala iha tinan ida ne’e. Agora dadaun Governu hala’o atividades diseminasaun no konsultasaun públika kona-ba Polítika Desentralizasaun iha distritu 13 Timor-Leste tomak.

Dialogu iha Distritu Dili hala’o iha loron 3 fulan Maiu tinan 2013 iha salaun Administrasaun Distritu, Baucau hala’o iha loron 13 fulan Maiu iha salaun Administrasaun Distritu, Lospalos hala’o iha loron 14 fulan Maiu iha salaun Administrasaun Distritu, no Distritu Manatuto hala’o iha loron 28 fulan Maiu. Dialogu ne’e hala’o ho apoiu husi UN Women no mós husi organizasaun sosiedade sivil hanesan Caucus Feto iha Polítika.

Objektivu prinsipal husi sorumutu ida ne’e maka atu loke dalan ba feto sira iha distritu ida-idak, hodi suporta feto maluk sira nia hanoin kona-ba saida mak sira hakarak halo no prepara hodi simu Munisipiu. Tanba feto sira mós presiza atu tau sira-nia hanoin iha asuntu barak no iha área hotu-hotu moris nian. Hanesan hato’o husi Sekretária Estadu ba Promosaun Igualdade, Sra. Idelta Maria Rodrigues iha ninia diskursu iha Distritu Baucau, katak feto sira buka atu hamutuk nafatin iha unidade nia laran hodi bele dezenvolve. Diferensa ne’ebé iha ita nia le’et nia normal, tanba la’ós atu hafahe fali feto sira. Sra. Idelta mós hatutan tan katak iha Camara Municipal ne’e ita la’ós atu promove deit feto sira, maibé ita tenke haree mós ida-idak ho nia kualidade. “Tanba ne’e feto sira mós tenke hatudu nia kapasidade katak ita feto mós bele no prontu ona atu simu Camara Municipio, ho liafuan murak Hamutuk Ita Bele,” katak Sekretária Estadu.

Reuniaun ne’ebé hala’o iha Baucau no Lospalos hetan partisipasaun Xefe Suku sira feto no mane, membru Konsellu Suku, reprezentante feto, ONG, funsionáriu públiku, feto foin-sa’e, lia nain feto sira, no mós feto membru PNTL sira. Feto sira mós antusias tebes iha reuniaun ne’e, tanba hatudu husi rezultadu diskusaun ne’ebé sira halo durante loron ida tomak nia laran. Iha rezultadu husi diskusaun ne’e maioria feto sira tau hanoin lisuk kona-ba sira-nia hakarak atu wainhira hala’o Asembleiu Munisipál, feto sira sujere atu tau 50% ba mane no 50% ba feto hodi tur iha. Hanoin seluk mak hanesan hadia merenda eskolar, dezenvolve rekursu naturais ne’ebé iha ona hodi bele produs fali osan ba populasaun iha distritu rasik no ba Governu lokal. Aleinde ne’e feto sira mós halo identifikasaun ba rekursu iha área turismu husi distritu ida-idak ne’ebé sira iha ona hodi atrai turista.

Rezultadu sira ne’ebé hato’o sei akumula hamutuk hodi tau hanesan hanoin jerál ida ne’ebé produs ba dokumentu ida husi feto potensiál distritu ida-idak nian, no sira rasik mak hato’o ba Primeiru Ministru iha atividade konsultasaun publika kona-ba estabelesimentu munisipiu.


Departamentu Media SEPI | Author : Chyqa d’Zouza
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270082

Ohin loron : 30
Hits ohin loron : 127
Total : 56221
Hits : 270082
Online : 1