» Notisias

Kuarta, 30 Maiu 2012

Planu Asaun Nasionál ba Violénsia bazeia ba Jéneru hetan Apovasaun husi Konsellu Ministru

Planu Asaun Nasionál ba Violénsia Bazeia ba Jéneru (PAN) hetan aprovasaun husi Konsellu Ministru iha sira-nia sesaun extra-ordinária iha loron 29 fulan Maiu 2012. Sekretaria Estadu ba Promosaun Igualdade Sra. Idelta Maria Rodrigues mak aprezenta draft ba Rezolusaun kona-ba aprovasaun ne’e ba Konsellu Ministru. Rezolusaun ne’e mós estabelese “Komisaun Inter-Ministeriál” kompostu husi Lińa-Ministeriál no membru sosiedade sivil, ho knaar atu koordena no monitora implementasaun PAN ne’e.

Bazeia ba Artigu 13 husi Lei Kontra Violénsia Doméstika, Sekretaria Estadu ba Promosaun Igualdade lidera prosesu hakerek PAN, ho apoiu tékniku husi Komité multi-setorál, UNPFA, no UN Women. Orsamentu ba prosesu dezenvolvimentu PAN ne’e mai husi Ajénsia Kooperasaun Espańol liu husi Fundu Objetivu Dezenvolvimenu Miléniu kona-ba “Suporta Igualdade Jéneru no Direitu Feto iha Timor-Leste.”

Iha prosesu halo PAN ne’e nia laran halo mós konsultasaun klean ho parte interessada barak, atu bele asegura suporta no mós reforsa apropriasaun husi Ministériu no Sekretaria Estadu relevante sira no mós husi instituisaun sira, prestador servisu no organizasaun sosiedade sivil, ne’ebé nesesariu ba implementasaun PAN ne’e. Liu husi prosesu konsultasaun, parte interessada sira hetan oportunidade hodi identifika papel espesifiku, mekanizmu koordenasaun, no buka kompromisu husi parseiru sira, ne’ebé sai nuudar baze ba implementasaun efetiva PAN nian.

Planu Asaun Nasionál kona-ba Violénsia Bazeia ba Jéneru mak abordajen multi-setorál dahuluk husi Timor-Leste ba kombate violénsia bazeia ba jéneru no identifika objetivu tempo badak no tempo naruk ba tinan tolu nian. Planu ne’e mós elabora oinsa instituisaun estadu sira, sosiedade sivil, no parseiru dezenvolvimentu sira sei servisu hamutuk iha setór edukasaun, servisu sosiais, justisa, seguransa, no saúde hodi atinji objetivu sira ne’e. PAN mós define área fokus estratéjiku, área ba kolaborasaun no mós mekanizmu diak ba koordenasaun, monitorizasaun, no avaliasaun.

Liu husi Planu nee, Governu buka atu prevene forma oi-oin violénsia bazeia ba jéneru, inklui violénsia doméstika, haree ba nesesidade vítima sira, no halo autór violénsia sira bele responsabiliz ba sira-nia hahalok.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255490

Ohin loron : 44
Hits ohin loron : 318
Total : 52783
Hits : 255490
Online : 5