» Notisias

Tersa, 08 Outubru 2013

Delegasaun Macedonia ho South Sudan Visita SEPI

Secretária de Estadu ba Promosaun Igualdade (SEPI) Sra. Idelta Rodrigues simu bainaka husi Macedonia ho South Sudan iha Segunda 7 de Outubru 2013 iha Palácio do Governo.

Asuntu visita ne’e hodi fahe informasaun ba malu entre Timor-Leste, Macedonia ho South Sudan konaba servisu jéneru nian.

Iha sorumutu ne’e delegasaun Macedonia ho South Sudan hakarak rona no buka hatene SEPI nia servisu.

Tuir informasaun ne’ebé sira asesu katak durante ne’e SEPI hala’o servisu no advokasia diak to’o nivel distritus nune’e sira hakarak visita hodi hatene klean liu tan programa SEPI.

Sra. Idelta Rodrigues iha sorumutu ne’e hato’o ba delegasaun husi rai rua ne’e katak durante tinan 8 hala’o servisu SEPI, hahú husi IV Governu Konstitusionál to’o V Governu Konstitusionál la’ós fasil.

SEPI nu’udar instituisaun Governu ho mandatu hala’o promosaun igualdade hala’o polítika abordajen integrada jéneru. Iha nivel nasionál ne’e halao iha kada Ministériu no Sekretaria Estadu liu husi uluk Pontu Fokal Jéneru no agora liu husi Grupu Traballu Jéneru ne’ebé lidera husi ofisiál nivel Diretor. Iha nivel distrital, programa ne’e hala’o husi uluk Ponta Fokál Jéneru ne’ebé troka ba Grupu Traballu Jéneru Distrital. Sekretáriu Distritál mak lidera Grupu Traballu Jéneru Distritál.

"Ami tenki hala’o advokasia diak no forte. Bainhira Lei Kontra Violénsia Doméstika hetan aprovasaun husi Parlamentu Nasionál no Presidente da Repúblika promulga, ami prepara kedas Planu Asaun Nasionál ba Violénsia Bazeia ba Jéneru. SEPI mak koordena implementasaun lei ne’e no Ministériu relevante sira hanesan Ministériu Solidariedade Sosiál, Ministériu Saúde, Ministériu Justisa, no Sekretaria Estadu ba Seguransa sai mós nu’udar implementadór,” tenik Sra. Idelta.

Kona-ba prevensaun violénsia bazeia ba jéneru, kada tinan SEPI hala’o programa “Kampańa Loron 16 Ativismu Kontra Violénsia Bazeia ba Jéneru” ba distritus ne’ebé identifika iha violénsia doméstika aas liu. Kampańa ne’e la’ós SEPI mesak mak hala’o, maibé kolabora ho instituisaun Governu sira seluk, organizasaun sosiedade sivil no mós instituisaun relijiozu sira.

Sra. Idelta Rodrigues mos informa ba delegasaun Macedonia ho South Sudan kona-ba aktvidades ka preparasaun ba Selebrasaun Loron Nasionál Feto durante 4 to’o 8 Novembru.

Iha sorumutu ne’e delegasaun husi South Sudan Sr. Ajak Kuol Dengdit, Senior Inspector for Gender & Coordinator EEW husi Ministry of Gender, Child & Social Welfare hateten katak servisu SEPI durante ne’e inspira sira hodi hala’o sira-nia programa no advokasia diak liután kona-ba igualdade jéneru.

“Difikuldade bo’ot ne’ebé ami hetan maka rai South Sudan ne’ebé luan no bo’ot tebtebes dalabarak difikulta ami nia servisu,” deklara Sr. Dengdit.

Susan Washuk husi South Sudan mos hateten katak sira la iha koordinasaun diak entre ONG sira ho governo no nia admira SEPI iha relasaun diak ho entidades hotu.

Delegasaun South Sudan mós observa no admira oinsa lider sira iha Timor-Leste ne’ebé ho haraik an hanesan ema bainbain, ba fatin públiku la uza eskoltu no fasil ba bainaka sira husi liur atu hasoru. Ida ne’e ba sira hanesan buat foun ida.

Sira hanoin katak ho atetude lider sira iha Timor-Leste nudar fator ida ne’ebé halo SEPI nia servisu iha progressu barak.

Representante husi Macedonia Sandra Anastasovska mós informa katak sira nia governo ladun tau matan no aloka orsamentu ba servisu jéneru. Maski iha vocal point no gender mainstream ne’ebé harii kleur ona maibe tulun ne’ebé sira hetan mai husi doador no ONG. Governo mos la iha political will atu promove igualdade jéneru.

Delegasaun rai rua ne’e sei iha Timor-Leste ba loron 10 hodi hasoru malu mós ho sosiedade sivil.


Departamentu Media SEPI | Author : Carlito Caminha
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270126

Ohin loron : 31
Hits ohin loron : 171
Total : 56222
Hits : 270126
Online : 5