» Notisias

Segunda, 18 Novembru 2013

SEPI La Kansela Orsamentu ba Membru Komité CEDAW

Media balun iha loron Sexta-Feira 15 Novembru 2013 hasai notisias katak Sekretaria Estadu ba Promosaun Igualdade (SEPI) kansela apoiu orsamentu ba Membru Komité CEDAW (Konvensaun ba Halakon Forma Hotu-Hotu Diskriminasaun Kontra Feto) husi Timor-Leste Sra. Milena Pires. Notisias ne’e sita husi Sra. Milena Pires iha enkontru Komisaun F Parlamentu Nasionál. Notisia ne’e kobre deit parte ida, husi Sra.Milena Pires maibe la kobre hanoin ka esplikasaun husi Sekretária Estadu ba Promosaun Igualdade Sra.Idelta Rodrigues, tanba sa kansela orsamentu ba Sentru ba Feto no Estudu Jéneru. Enkontru iha Parlamentu Nasional ne’e hala’o hodi haree ba orsamentu SEPI iha tinan 2013, no iha okaziaun ne’e Sekretária Estadu ba Promosaun Igualdade hato’o aprezentasaun kona-ba ezekusaun orsamentu tinan 2012 no pontu ida husi aprezentasaun ne’e mak kona-ba apoiu ba Membru Komite CEDAW. Relasiona ho notisias ne’e, ami hakarak hato’o esplikasaun tuir mai hodi ema barak bele hatene di’ak liu kona-ba asuntu ne’e:

1. Governu la kansela orsamentu ba apoiu ba Membru Komité CEDAW husi Timor-Leste, maibé Governu kansela orsamentu ne’ebé aloka ba Sentru ba Feto no Estudu Jéneru (instituisaun năo-governamental ne’ebe Sra. Milena Pires hari’i no nia rasik nudar Diretora Ezekutiva). Governu kontinua ninia apoiu ho orsamentu ne’ebé hahú iha 2012 ba Membru Komité CEDAW hamutuk ho Asistente Ezekutiva no Peskizadora. Kanselamentu ne’ebé Konsellu Ministru deside iha loron 9 fulan Juńu tinan 2013 ne’e tanba Sentru ba Feto no Estudu Jéneru hanesan instituisaun ka organizasaun năo-governamental no la’os instituisaun ida ne’ebé parte governo nian nune’e labele hetan alokasaun orsamentu liu husi orsamentu annual ne’ebé aloka ba SEPI.

Normalmente, organizasaun năo-governamental hato’o proposta ba Asesor Sosiedade Sivil iha Gabinete Primeiru Ministru, ne’ebé iha regras kona-ba orsamentu ne’ebé apoi organizasaun ka instituisaun náo-governmental. Membru Komité CEDAW husi Timor-Leste Sra. Milena Pires mak sai nu’udar Diretora Ezekutiva ba Sentru ba Feto no Estudu Jéneru ne’e mak halo ema balu la distinge buat rua ne’e. Ita tenke distinge Sra. Milena Pires nia posizaun nu’udar Membru Komité CEDAW ho ninia posizaun nu’udar Diretora Ezekutiva Sentru ba Feto no Estudu Jéneru. Buat rua ne’ebé la hanesan, maske ema ne’ebé kaer kargo rua ne’e ida deit.

2. Sra. Milena Pires nu’udar Membru Komité CEDAW la’ós reprezenta Timor-Leste iha Komité CEDAW. Maske Timor-Leste nu’udar estadu-parte (“state-party”) ba Konvensaun CEDAW (Konvensaun ba Halakon Forma Hotu-Hotu Diskriminasaun Kontra Feto) mak nomeia kandidatura Sra. Milena Pires sai nu’udar Membru Komité CEDAW, bazeia ba Konvensauan CEDAW, Membru Komité CEDAW hala’o knaar nu’dar perita/peritu independente (katak independente husi Governu). Komité CEDAW mak orgaun peritus ne’ebé nia mandatu atu haree progresu feto iha kada nasaun ne’ebé sai nu’udar estadu-parte ba Konvensaun CEDAW. Membru Komité CEDAW hala’o analize ba Relatóriu CEDAW ne’ebé periodikamente hato’o husi estadu-parte sira, partisipa iha reuniaun Komité CEDAW, sai nu’udar “Country Rapporteur” ba nasaun ida ne’ebé hato’o relatóriu no halo esbosu “Concluding Observations” (“Observasaun Finál”) ba relatóriu ne’e.

Timor-Leste nu’udar estado-parte ba CEDAW iha obrigasaun hato’o Relatóriu kada tinan hat (4). Sekretária Estadu ba Promosaun Igualdade (SEPI) mak koordena hakerek relatóriu ne’e bazeia ba progresu ne’ebé parte barak hala’o iha Timor-Leste. SEPI mak haruka relatóriu ne’e ba Komité CEDAW no reprezenta Timor-Leste iha reuniaun Komité CEDAW kona-ba relatóriu ne’e. Bazeia ba regra husi Komité CEDAW, Membru Komité CEDAW husi nasaun ida sei la envolve iha prosesu análiza no reuniaun Komité CEDAW kona-ba relatóriu husi ninia nasaun. Ida ne’e hodi evita “conflict of interest” (konflitu interese entre ninia posizaun nu’udar cidadaun Timor-Leste no nu’udar Membru Komité CEDAW). Nune’e, Sra. Milena Pires nu’udar Membru Komité CEDAW sei la envolve iha prosesu análiza Relatóriu CEDAW husi Timor-Leste no reuniaun Komité CEDAW kona-ba relatóriu ne’e.

Ami husu ba media sira, katak bainhira hala’o kobertura tuir duni prinsipiu “cover both sides” ka kobre parte rua hotu, ho nune’e lee-nain sira hetan informasaun kompletu kona-ba asuntu ne’ebé jornalista sira kobre.


Departamentu Media SEPI | Author : Carlito ho Nug
Loron Boot SEPI
Loron Internasionál Feto RuráL
Loron Nasionál Feto Timor
Kampańa Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

270130

Ohin loron : 31
Hits ohin loron : 175
Total : 56222
Hits : 270130
Online : 1