» Notisias

Kuarta, 30 Abril 2014

SEPI Hala’o Workshop kona-ba Prevensaun Korupsaun

Sekretaria Estadu ba Promosaun Igualdade (SEPI) hala’o workshop ida kona-ba “Prosedimentu Legais no Dezafiu Atu Prevene no Kombate Korupsaun” iha loron 30 Abril 2014. Workshop ne’ebé hola fatin iha Salaun Maria Gorete, Edifisiu SEPI eis-Obrigado Barracks ne’e Gabinete Inspetora no Auditoria mak realiza bazeia ba Planu Asaun Anuál 2014.

“Alvu husi workshop ne’e mak funsionáriu SEPI tomak inklui Ponto Fokál SEPI iha distritu sanulu resin tolu. Workshop ne’e nia objetivu mak atu hasa’e funsionáriu SEPI sira nia koñesimentu kona-ba regras no prosedimentu sira atu bele prevene no kombate korupsaun,” esplika Inspetora no Auditora SEPI Sra. Maria José Sanches. “Ho workshop ne’e, espera katak funsionáriu SEPI nian hotu, inklui Ponto Fokál SEPI, bele hetan informasaun adekuadu no konsiente ba prátika aat sira ne’ebé bele tau ein kauza dignidade Estado de Direito Democrático no partikularmente, dignidade Administrasaun Publika,” tenik Inspetora no Auditoria. Liu husi workshop ne’e, espera mós katak funsionáriu SEPI bele hatene krime saída deit maka eziste iha funsaun públika nia ezersisiu, saída maka korupsaun ativa, korupsaun pasiva no krime sira ne’e regula iha ne’ebé.

Liafuan “korupsaun” iha Timor-Leste sai tiha ona hanesan “Ami Aman” ida ne’ebé dadér-sán deit invade ona ema hotu nia ibun, nia ulun, nia kakutak liu husi jornal, radio, televizaun, no seluk-seluk tan. Estadu Timor-Leste hatudu ona kompromisu no determinasaun maka’as hodi luta hasoru moras aat ho naran korupsaun ne’e, liu husi mekanizmu oin-oin no harii mós Komisaun Anti Korupsaun. “Hanesan orgaun Governu nian mós, Sekretaria Estadu ba Promosaun Igualdade iha obrigasaun atu prevene no kombate hasoru korupsaun liu husi fahe informasaun ba funsionáriu tomak kona-ba prátikas di’ak no prátikas ne’ebé ladi’ak ka la-lós,” esplika tan Sra. Maria José Sanches.

Nu’udar funsionáriu públiku, ema hotu ne’ebé servisu iha SEPI presiza atu hakle’an sira nia koñesimentu hodi ka’er metin prinsípiu sira hanesan honestidade, integridade, igualdade, governasaun di’ak, no seluk tan. Maské SEPI, instituisaun ida ne’ebé ki’ik no probabilidade atu hamosu korupsaun finanseiru ka patrimonial minimu liu, importante atu fó atensaun hodi haburas iha funsionáriu hotu nia konsiénsia konabá lei no regulamentu hotu ne’ebé vigora iha Timor-Leste nakait ho prátika korupsaun.

Iha tinan 2013, SEPI realiza tiha ona workshop da’huluk ho tema “Korupsaun: Oinsá atu prevene no kombate”. Tinan 2014 ida ne’e, ba workshop da’ruak ne’e, alein de envolve Komisaun Anti-Korupsun (CAC), Provedoria de Direitos Humanos e Justiça (PDHJ) no Inspesaun Jerál Estadu (IGE), SEPI mós envolve Komisaun Nasional Funsaun Públika atu nune’e bele fahe informasaun foun karik iha.

“SEPI mós fanu nafatin funsionáriu SEPI nian tomak kona-ba nesesidade atu observa no implementa Lei Funsaun Públika, observa sira-nia direitus, deveres atu fó fatin aas liu ba dignidade Governu no Adminisrasaun Públika, hatudu transparénsia bainhira hala’o kna’ar, responsavel ba kna’ar administrativu no finanseiru, no seluk tan,” katak Sra. Maria José Sanches.

Nu’udar funsionáriu públiku, iha dever atu observa no implementa Kodigu Etika ba Funsaun Públika ne’ebé hatur nanis ona iha Lei Funsaun Publika atu nune’e, bele hatene saída maka lós no saída maka la lós. Konserteza, la fasil atu prevene no kombate korupsaun, dezafius oin-oin sei hasoru bebeik, maibé hanesan funsionáriu públiku no sidadaun Timor-Leste, hot-hotu iha obrigasaun atu halo prevensaun.


Departamentu Media SEPI | Author : Nug
Loron Boot SEPI
Loron Internasionál Feto RuráL
Loron Nasionál Feto Timor
Kampaña Loron 16 Ativismu Kontra Violénsia Bazéia ba Jéneru
Loron Internasionál Feto
Arkivu
Statistika Vizitantes

255581

Ohin loron : 2
Hits ohin loron : 48
Total : 52796
Hits : 255581
Online : 2